தனது உயர் அதிகாரியாலேயே பாலியல் வன்கொடுமைக்கு உள்ளாக்கப்பட்ட அதிர்ச்சி சம்பவம் வெளிச்சத்திற்கு வந்துள்ளது.
பங்குனி 01|திங்கள் கிழமை
மார்ச் 16|கோவை
கோவையில் தமிழ்நாடு சிறப்பு காவல் படை நான்காவது பட்டாலியன் பிரிவில் பணியாற்றி வரும் 45 வயதான பெண் காவலர் ஒருவர், தனது உயர் அதிகாரியாலேயே பாலியல் வன்கொடுமைக்கு உள்ளாக்கப்பட்ட அதிர்ச்சி சம்பவம் வெளிச்சத்திற்கு வந்துள்ளது. அந்தப் பெண் காவலரை அலுவலக அறைக்குள் வைத்து கமாண்டன்ட் செந்தில்குமார் சீண்டலில் ஈடுபட்டு, பாலியல் ரீதியாகத் துன்புறுத்தியதாகக் கூறப்படுகிறது. பாதுகாப்பு வழங்க வேண்டிய அதிகாரியே இத்தகைய அநாகரிகச் செயலில் ஈடுபட்டது காவல் துறை வட்டாரத்தில் பெரும் அதிர்வலைகளை ஏற்படுத்தியுள்ளது.
இந்தக் கொடூரச் செயலுக்கு அதே பிரிவில் பணியாற்றும் பெண் உதவி ஆய்வாளர் புஷ்பகுமாரி உடந்தையாக இருந்ததுதான் வேதனையான விஷயம். பாதிக்கப்பட்ட பெண் காவலரைத் திட்டமிட்டு, கமாண்டன்ட் செந்தில்குமாரின் அறைக்குள் வலுக்கட்டாயமாகத் தள்ளிவிட்டுச் சென்றதாக புஷ்பகுமாரி மீது குற்றம் சாட்டப்பட்டுள்ளது. ஒரு பெண்ணே மற்றொரு பெண்ணைச் சிக்க வைத்தது இந்தப் புகாரின் தீவிரத்தை அதிகப்படுத்தியுள்ளது.
பாதிக்கப்பட்ட பெண் காவலர் தைரியமாக அளித்த புகாரின் பேரில், தற்போது கமாண்டன்ட் செந்தில்குமார் கைது செய்யப்பட்டுள்ளார். அவருக்கு உடந்தையாக இருந்த பெண் உதவி ஆய்வாளர் புஷ்பகுமாரி மீதும் வழக்குப் பதிவு செய்யப்பட்டு விசாரணை துரிதப்படுத்தப்பட்டுள்ளது. காவல் துறையினருக்குள்ளேயே நடந்த இச்சம்பவம் குறித்து விரிவான விசாரணை நடத்தப்பட்டு வருவதோடு, தவறு செய்தவர்கள் மீது கடும் நடவடிக்கை எடுக்கப்படும் என உயர் அதிகாரிகள் தெரிவித்துள்ளனர்.
